യുഎഇയുടെ ബഹിരാകാശ നിരീക്ഷണ ശേഷിയിൽ വൻ മുന്നേറ്റം കുറിച്ചുകൊണ്ട് തദ്ദേശീയമായി നിർമിച്ച എംബിഇസെഡ്-സാറ്റ്, എത്തിഹാദ്-സാറ്റ് എന്നീ ഉപഗ്രഹങ്ങൾ പകർത്തിയ ആദ്യ ചിത്രങ്ങൾ മുഹമ്മദ് ബിൻ റാഷിദ് ബഹിരാകാശ കേന്ദ്രം പുറത്തുവിട്ടു. ലോക ബഹിരാകാശ വാരത്തോടനുബന്ധിച്ചാണ് ഈ ചരിത്രപരമായ പ്രഖ്യാപനം. സിവിൽ, അടിസ്ഥാന സൗകര്യ വികസനം, സമുദ്ര നിരീക്ഷണം, പരിസ്ഥിതി പഠനം തുടങ്ങി നിർണായക മേഖലകൾക്ക് ലോകോത്തര നിലവാരത്തിലുള്ള ഭൗമ നിരീക്ഷണ വിവരങ്ങൾ നൽകാനുള്ള യുഎഇയുടെ ശേഷി ഈ നേട്ടത്തിലൂടെ കൂടുതൽ ശക്തിപ്പെട്ടു.
ഈ രണ്ട് ഉപഗ്രഹങ്ങളും വ്യത്യസ്തമെങ്കിലും പരസ്പരം പൂരകമായ സാങ്കേതികവിദ്യകളാണ് ഉപയോഗിക്കുന്നത്. യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാന്റെ പേര് നൽകിയ എംബിഇസെഡ്-സാറ്റ് മേഖലയിലെ ഏറ്റവും നൂതനമായ ഒപ്റ്റിക്കൽ ഇമേജിങ് ഉപഗ്രഹമാണ്. 2025 ജനുവരിയിലാണ് ഇത് വിക്ഷേപിച്ചത്. എന്നാൽ, 2025 മാർച്ചിൽ വിക്ഷേപിച്ച എത്തിഹാദ്-സാറ്റ് കേന്ദ്രത്തിന്റെ ആദ്യത്തെ സിന്തറ്റിക് അപ്പേർച്ചർ റഡാർ ഉപഗ്രഹമാണ്. എല്ലാ കാലാവസ്ഥയിലും വെളിച്ചത്തിലും ഡാറ്റ ശേഖരിക്കാൻ എസ്എആർ ഉപഗ്രഹങ്ങൾക്ക് സാധിക്കും. ഈ രണ്ട് സാങ്കേതികവിദ്യകളും സംയോജിപ്പിക്കുന്നതിലൂടെ ദുരന്ത നിവാരണം മുതൽ സ്മാർട്ട് കൃഷി, അടിസ്ഥാന സൗകര്യ വികസനം വരെയുള്ള നിർണായക മേഖലകളിലെ തീരുമാനങ്ങളെടുക്കാൻ ആവശ്യമായ സ്ഥിരതയും കൃത്യതയുമുള്ള വിവരങ്ങളാണ് യുഎഇക്ക് ലഭിക്കുക.
750 കിലോഗ്രാം ഭാരവും 3മീ x 5മീ വലുപ്പവുമുള്ള എംബിഇസെഡ്-സാറ്റ് എമിറാത്തി എൻജിനീയർമാരുടെ വിപുലമായ പരിശ്രമത്തിന്റെ ഫലമാണ്. ഇതിന്റെ 90% മെക്കാനിക്കൽ ഘടനകളും യുഎഇയിലെ പ്രാദേശിക നിർമാതാക്കളാണ് നിർമിച്ചത്. മുൻ മോഡലുകളേക്കാൾ ഇരട്ടി കൃത്യതയോടെ ചിത്രങ്ങൾ പകർത്താൻ ശേഷിയുള്ള ക്യാമറ, നാല് മടങ്ങ് വേഗത്തിലുള്ള ഡാറ്റ ട്രാൻസ്മിഷൻ, ചിത്രം പകർത്തി രണ്ട് മണിക്കൂറിനുള്ളിൽ ലഭ്യമാക്കാനുള്ള ശേഷി എന്നിവ ഈ ഉപഗ്രഹത്തിന്റെ പ്രത്യേകതകളാണ്. പരിസ്ഥിതി മാറ്റങ്ങൾ നിരീക്ഷിക്കാനും ദുരിതാശ്വാസ പ്രവർത്തനങ്ങൾക്കും ഇത് ഒരു ശക്തമായ ഉപകരണമാണ്.
എത്തിഹാദ്-സാറ്റ് വിക്ഷേപണത്തോടെ യുഎഇയുടെ സാറ്റലൈറ്റ് വികസന പദ്ധതി ഒരു വലിയ കുതിച്ചുചാട്ടമാണ് നടത്തിയിരിക്കുന്നത്. പരമ്പരാഗത ഒപ്റ്റിക്കൽ ഉപഗ്രഹങ്ങളിൽ നിന്ന് വ്യത്യസ്തമായി, മേഘങ്ങളോ പകലോ രാത്രിയോ പ്രശ്നമല്ലാത്ത റഡാർ സിഗ്നലുകൾ ഉപയോഗിച്ച് ഉയർന്ന റെസല്യൂഷൻ ചിത്രങ്ങൾ എടുക്കാൻ എസ്എആർ സാറ്റലൈറ്റുകൾക്ക് കഴിയും. സമുദ്ര ഗതാഗതം, എണ്ണ ചോർച്ച കണ്ടെത്തൽ, പ്രകൃതിദുരന്ത നിരീക്ഷണം, കൃത്യമായ കൃഷിക്ക് വേണ്ട പിന്തുണ നൽകൽ എന്നിവയ്ക്ക് ഈ ഡാറ്റ അത്യന്താപേക്ഷിതമാണ്.