ശബരിമലയിലെ സ്വര്ണപ്പാളിയില് തിരിമറി നടന്ന സംഭവത്തില് ഹൈക്കോടതി പരാമര്ശങ്ങള് ചൂണ്ടിക്കാട്ടി ദേവസ്വം മന്ത്രി വി.എന്.വാസവന്റെ രാജി ആവശ്യപ്പെട്ട് നിയമസഭയില് തുടര്ച്ചയായ രണ്ടാം ദിവസവും പ്രതിപക്ഷം ബഹളം വച്ചതോടെ സഭ പിരിഞ്ഞു. ശബരിമലയിലെ സ്വര്ണമോഷണം ചോദ്യോത്തര വേളയില് പ്രതിപക്ഷം ഉന്നയിച്ചു. ബാനറുകളുമായി പ്രതിപക്ഷ അംഗങ്ങള് സഭയുടെ നടുത്തളത്തില് ഇറങ്ങി പ്രതിഷേധിച്ചു. സ്പീക്കറുടെ മുന്നില് ബാനര് ഉയര്ത്തി മുദ്രാവാക്യം വിളിച്ചാണ് പ്രതിപക്ഷാംഗങ്ങള് പ്രതിഷേധിച്ചത്. ഇതിനിടയില് സഭാ നടപടികള് പൂര്ത്തിയാക്കി ബില്ലുകള് പാസാക്കി സഭ പിരിഞ്ഞതായി സ്പീക്കര് അറിയിക്കുകയായിരുന്നു.
ശബരിമലയിലെ സ്വര്ണം മൂടിയ ദ്വാരപാലക ശില്പം ഉയര്ന്ന വിലയ്ക്കു വില്പന നടത്തി എന്നാണ് ഹൈക്കോടതിയുടെ കണ്ടെത്തലെന്ന് പ്രതിപക്ഷ നേതാവ് വി.ഡി.സതീശന് പറഞ്ഞു. ലക്ഷക്കണക്കിന് വിശ്വാസികളെ ദേവസ്വം ബോര്ഡ് വഞ്ചിച്ചു. ദേവസ്വം മന്ത്രി രാജിവക്കണം, ദേവസ്വം ബോര്ഡിനെ പുറത്താക്കണം. തീരുമാനം ഇന്നുണ്ടാകണമെന്നും പ്രതിപക്ഷ നേതാവ് പറഞ്ഞു. ഹൈക്കോടതിയെ പോലും അംഗീകരിക്കാത്ത നിലപാടാണ് പ്രതിപക്ഷം സ്വീകരിച്ചിരിക്കുന്നതെന്ന് നിയമമന്ത്രി പി.രാജീവ് പറഞ്ഞു. ഏത് അന്വേഷണത്തെയും സര്ക്കാര് സ്വാഗതം ചെയ്യുന്നതായും മന്ത്രി പറഞ്ഞു. ഉന്നത നീതിപീഠത്തില് പ്രതിപക്ഷത്തിന് വിശ്വാസം നഷ്ടപ്പെട്ടെന്ന് പാര്ലമെന്ററികാര്യ മന്ത്രി എം.ബി.രാജേഷ് പറഞ്ഞു. രാഷ്ട്രീയ കളിയുമായി ഇങ്ങോട്ടു വരരുതെന്ന് ഇന്നലെയാണ് ഒരു കോണ്ഗ്രസ് അംഗത്തോട് സുപ്രീംകോടതി പറഞ്ഞത്. പ്രതിപക്ഷത്തിന് കോടതിയെയും ജനത്തെയും പേടിയാണെന്നും മന്ത്രി പറഞ്ഞു.