ആലപ്പുഴ∙ പത്തിയൂരിൽ തിരഞ്ഞെടുപ്പിൽ സീറ്റ് കിട്ടാത്തതിന്റെ വിഷമത്തിൽ കോൺഗ്രസ് പ്രവർത്തകൻ ആത്മഹത്യയ്ക്കു ശ്രമിച്ചു. 19-ാം വാർഡിലെ ബൂത്ത് പ്രസിഡന്റ് നിരണത്ത് സി. ജയപ്രദീപാണ് ജീവനൊടുക്കാൻ ശ്രമിച്ചത്. പത്തിയൂർ വെസ്റ്റ് കോൺഗ്രസ് മണ്ഡലം പ്രസിഡന്റ് രാജീവ് വല്ലത്തിനെ ഫോണിൽ വിളിച്ച് ഇത് അവസാനത്തെ വിളിയാണെന്ന് പറഞ്ഞ് ജയപ്രദീപ് ഫോൺ സ്വിച്ച് ഓഫാക്കി. മണ്ഡലം പ്രസിഡന്റ് ഇക്കാര്യം വാർഡ് പ്രസിഡന്റിനെ അറിയിച്ചു.
വാർഡ് പ്രസിഡന്റ് വീട്ടിലെത്തിയപ്പോൾ ജീവിനൊടുക്കാനുള്ള ശ്രമത്തിൽ നിന്ന് ജയപ്രദീപിനെ വീട്ടുകാർ രക്ഷപ്പെടുത്തിയിരുന്നു. വാർഡ് കമ്മിറ്റിയിൽ സ്ഥാനാർഥിയായി ജയപ്രദീപിന്റെ പേര് മാത്രം വന്നതിനാൽ പോസ്റ്റർ പതിച്ചും ഫ്ലക്സ് അടിച്ചും പ്രചാരണം തുടങ്ങിയിരുന്നു. ഇതിനിടെ യുഡിഎഫ് സ്ഥാനാർഥിയായി കേരള കോൺഗ്രസിലെ സത്യൻ പോസ്റ്റർ അടിച്ച് രംഗത്ത് വന്നതോടെയാണ് ജയപ്രദീപിനു മാനസികാഘാതം ഉണ്ടായതും ജീവനൊടുക്കാൻ ശ്രമിച്ചതും.