ഇടത് സഹയാത്രികനും മുന് എംഎല്എയുമായ സംവിധായകന് പി.ടി.കുഞ്ഞുമുഹമ്മദിനെതിരെ സംവിധായിക നല്കിയ ലൈംഗികാതിക്രമ പരാതിയുമായി ബന്ധപ്പെട്ട കേസില് കന്റോണ്മെന്റ് പൊലീസ് കോടതിയില് റിപ്പോര്ട്ട് സമര്പ്പിക്കും. പരാതിയില് പറയുന്ന ഹോട്ടലിലെ സിസിടിവി ദൃശ്യങ്ങള് ഉള്പ്പെടെ പരിശോധിച്ച ശേഷമാണ് റിപ്പോര്ട്ട് സമര്പ്പിക്കുന്നത്. സംവിധായിക പരാതിയില് പറയുന്ന സമയത്ത് ഇരുവരും ഹോട്ടലില് ഉണ്ടായിരുന്നുവെന്നു വ്യക്തമായിട്ടുണ്ട്.
അതിനിടെ, സംവിധായികയുടെ രഹസ്യമൊഴി ഇന്നു ചീഫ് ജുഡീഷ്യല് മജിസ്ട്രേട്ട് കോടതി രേഖപ്പെടുത്തും. പരാതിക്കാരിയുടെ മൊഴി രേഖപ്പെടുത്തിയ പൊലീസ് രഹസ്യമൊഴി രേഖപ്പെടുത്തണമെന്ന് ആവശ്യപ്പെട്ടു പൊലീസ് കോടതിയെ സമീപിച്ചിരുന്നു. പി.ടി.കുഞ്ഞുമുഹമ്മദ് സെഷന്സ് കോടതിയില് നല്കിയിരിക്കുന്ന മുന്കൂര് ജാമ്യാപേക്ഷയില് തീരുമാനമായതിനു ശേഷമാകും പൊലീസ് ചോദ്യം ചെയ്യുക.
സ്ത്രീകള്ക്കെതിരായ ശാരീരികാക്രമണം, ലൈംഗിക ഉദ്ദേശ്യത്തോടെയുള്ള ശാരീരിക സമ്പര്ക്കം, ലൈംഗിക പരാമര്ശങ്ങള് നടത്തുക എന്നീ വകുപ്പുകളാണ് കുഞ്ഞുമുഹമ്മദിനെതിരെ ചുമത്തിയിട്ടുള്ളത്. നവംബര് 27ന് സംവിധായിക മുഖ്യമന്ത്രിക്കു നല്കിയ പരാതിയില് ഡിസംബര് എട്ടിനാണ് കന്റോണ്മെന്റ് പൊലീസ് കേസെടുത്തത്.