വാഹനമോടിക്കുമ്പോൾ ഡ്രൈവർമാരുടെ ചെറിയൊരു ശ്രദ്ധക്കുറവ് പോലും എത്രത്തോളം വലിയ ദുരന്തങ്ങൾക്കാണ് വഴിവയ്ക്കുക എന്ന് ഓർമിപ്പിച്ച് അബുദാബി പൊലീസ് പുറത്തുവിട്ട വിഡിയോ ശ്രദ്ധേയമാകുന്നു. റോഡിൽ സംഭവിക്കുന്ന ഭയാനകമായ അപകടങ്ങളുടെ സിസിടിവി ദൃശ്യങ്ങൾ ഉൾപ്പെടുത്തിയാണ് പൊലീസ് ബോധവൽക്കരണ വിഡിയോ തയാറാക്കിയിരിക്കുന്നത്. നിമിഷങ്ങൾക്കുള്ളിൽ സാധാരണ യാത്രകൾ എങ്ങനെ വൻ ദുരന്തങ്ങളായി മാറുന്നു എന്ന് ദൃശ്യങ്ങൾ വ്യക്തമാക്കുന്നു.
വിഡിയോയിലെ ഒരു ദൃശ്യത്തിൽ മുൻപിലുണ്ടായിരുന്ന വാഹനത്തിന് പിന്നിലേക്ക് അമിതവേഗത്തിൽ വന്ന കാർ ഇടിച്ചുകയറുന്നത് കാണാം. നിയന്ത്രണം വിട്ട കാർ ഇടിച്ചതിനെത്തുടർന്ന് ചങ്ങലപോലെ മറ്റ് വാഹനങ്ങളും ഒന്നൊന്നിന് പിന്നാലെ കൂട്ടിയിടിച്ചു. ഇടിഞ്ഞുവീണ വാഹനഭാഗങ്ങൾ റോഡിലാകെ ചിതറിത്തെറിച്ചതോടെ ട്രാഫിക് പൂർണമായും തടസ്സപ്പെട്ടു. ഇടിച്ച കാറിന്റെ ആഘാതത്തിൽ മുന്നിലുണ്ടായിരുന്ന ഒരു വാഹനം തൊട്ടടുത്ത മറ്റൊരു കാറിന് മുകളിലേക്ക് ഭാഗികമായി കയറിയ നിലയിലായിരുന്നു.
മറ്റൊരു അപകടത്തിൽ, ഒരു കാർ മറ്റൊരു വാഹനത്തിന് പിന്നിൽ ഇടിക്കുകയും അത് തുടർച്ചയായ കൂട്ടിയിടികൾക്ക് കാരണമാവുകയും ചെയ്തു. എന്നാൽ ഈ ബഹളത്തിനിടയിലും അതീവ ജാഗ്രത പാലിച്ച മറ്റൊരു ഡ്രൈവർ സമയോചിതമായി വാഹനം വെട്ടിച്ച് അപകടത്തിൽപ്പെടാതെ രക്ഷപ്പെടുന്നതും വിഡിയോയിലുണ്ട്.