പാകിസ്താന്റെ ഓരോ ഇഞ്ച് പ്രദേശവും ഇപ്പോൾ ഇന്ത്യയുടെ ബ്രഹ്മോസ് മിസൈലുകളുടെ പരിധിയിലാണെന്ന് പ്രതിരോധ മന്ത്രി രാജ്നാഥ് സിങ്. ലഖ്നൗവിലെ ബ്രഹ്മോസ് എയ്റോസ്പേസ് യൂണിറ്റിൽ നിർമ്മിച്ച ആദ്യ ബാച്ച് ബ്രഹ്മോസ് മിസൈലുകൾ ഫ്ലാഗ് ഓഫ് ചെയ്ത ചടങ്ങിൽ സംസാരിക്കുമ്പോഴാണ് അദ്ദേഹം പാകിസ്താന് ശക്തമായ മുന്നറിയിപ്പ് നൽകിയത്.
രാജ്നാഥ് സിങ്ങും ഉത്തർപ്രദേശ് മുഖ്യമന്ത്രി യോഗി ആദിത്യനാഥും ചേർന്നാണ് മിസൈലുകൾ ഫ്ലാഗ് ഓഫ് ചെയ്തത്. ശത്രുക്കൾക്ക് ഇന്ത്യയുടെ ആധുനിക മിസൈലുകളിൽനിന്ന് ഇനി ഒഴിഞ്ഞുമാറാൻ കഴിയില്ലെന്ന് രാജ്നാഥ് സിങ് പറഞ്ഞു. ഇന്ത്യൻ സൈന്യത്തിന് വിജയം ഒരു ശീലമായി മാറിയിരിക്കുന്നെന്നും രാജ്നാഥ് സിങ് ‘ഓപ്പറേഷൻ സിന്ദൂറി’ന്റെ വിജയത്തെ പ്രശംസിച്ചുകൊണ്ട് പറഞ്ഞു.
ബ്രഹ്മോസ് ഒരു മാസത്തിനുള്ളിൽ രണ്ട് രാജ്യങ്ങളുമായി ₹4,000 കോടി രൂപയുടെ കരാറുകളിൽ ഒപ്പുവെച്ചതായി രാജ്നാഥ് സിങ് അറിയിച്ചു. അടുത്ത സാമ്പത്തിക വർഷം മുതൽ ലഖ്നൗ യൂണിറ്റിന്റെ വിറ്റുവരവ് ഏകദേശം ₹3,000 കോടി രൂപയായിരിക്കും. വാർഷിക ജിഎസ്ടി പിരിവ് ₹5,000 കോടി രൂപയായിരിക്കുമെന്നും അദ്ദേഹം പറഞ്ഞു. പ്രതിരോധ സാങ്കേതികവിദ്യയുടെ വിജ്ഞാന കേന്ദ്രമായി ലഖ്നൗ മാറുമെന്നും വരും വർഷങ്ങളിൽ മറ്റ് രാജ്യങ്ങളിലെ വിദഗ്ധർ ഇവിടെ എത്തുമെന്നും അദ്ദേഹം പ്രത്യാശ പ്രകടിപ്പിച്ചു.
സൂപ്പർസോണിക് ക്രൂയിസ് മിസൈൽ സംവിധാനത്തിന്റെ നിർമ്മാതാക്കളായ ബ്രഹ്മോസ് എയ്റോസ്പേസ്, ലഖ്നൗവിലെ സരോജിനി നഗറിലുള്ള പുതിയ ഇന്റഗ്രേഷൻ ആൻഡ് ടെസ്റ്റിങ് യൂണിറ്റിൽ നിന്നുള്ള ആദ്യ ബാച്ചിന്റെ നിർമാണം പൂർത്തിയാക്കിയിട്ടുണ്ട്. 2025 മേയ് 11-ന് ഉദ്ഘാടനം ചെയ്ത ഈ അത്യാധുനിക യൂണിറ്റിൽ മിസൈൽ സംയോജനം, പരിശോധന, അന്തിമ ഗുണനിലവാര പരിശോധന എന്നിവയ്ക്കെല്ലാം സൗകര്യങ്ങളുണ്ട്.