കാഠ്മണ്ഡു:നേപ്പാളിൽ സംഘർഷാവസ്ഥയിൽ കുടുങ്ങിയത് 40-ഓളം മലയാളി ടൂറിസ്റ്റുകളാണ്. കോഴിക്കോട് നിന്നുള്ള ഒരു ട്രാവൽസ് മുഖേനയാണ് ഇവർ യാത്ര തിരിച്ചത്. സംഘം അധികവും പ്രായമായവരായതിനാൽ സ്ഥിതി കൂടുതൽ വിഷമകരമായിരുന്നു. ആദ്യ രാത്രി തന്നെ ടൂർ ഓപ്പറേറ്റർമാർ ഒരുക്കിയിരുന്ന താമസ സൗകര്യങ്ങളിൽ പ്രവേശിക്കാനായില്ല. തെരുവിൽ തന്നെ സമയം ചെലവഴിക്കേണ്ടി വന്ന യാത്രക്കാർക്ക് പിന്നീട് താൽക്കാലിക താമസ സൗകര്യം ഒരുക്കിയതായി വിവരം ലഭിച്ചിട്ടുണ്ട്.
ഇന്നലെ പുലർച്ചെയായിരുന്നു സംഘം ഇന്ത്യയിൽ നിന്ന് വിമാന മാർഗം കാഠ്മണ്ഡുവിലെത്തിയത്. പ്രദേശത്തെ കലുഷിതാവസ്ഥയെക്കുറിച്ച് മുൻകൂട്ടി അറിവുണ്ടായിരുന്നെങ്കിൽ ഇത്തരം ബുദ്ധിമുട്ടുകൾ നേരിടേണ്ടിവരില്ലായിരുന്നുവെന്ന് അവർ പറയുന്നു. സംഘർഷത്തെക്കുറിച്ചുള്ള സൂചനകൾ ലഭിച്ചിരുന്നുവെങ്കിലും സംഭവസ്ഥിതിയുടെ ഗൗരവം മനസ്സിലാക്കാൻ കഴിഞ്ഞില്ലെന്ന് യാത്രക്കാർ വ്യക്തമാക്കുന്നു.
നിലവിൽ അവസ്ഥ ആശങ്കാജനകമല്ലെന്നും സാഹചര്യം സമാധാനപരമാണെന്നും സംഘം അറിയിച്ചു. എങ്കിലും, എത്രയും വേഗം നാട്ടിലെത്തിക്കാനുള്ള നടപടികൾ ആരംഭിക്കണമെന്നാവശ്യപ്പെട്ട് അവർ ബന്ധപ്പെട്ട അധികാരികളോടും ടൂർ ഓപ്പറേറ്റർമാരോടും അഭ്യർത്ഥിച്ചു.